Буян шэнгээһэн буряад хэлэн
Хизаарай правительствын ба Агын тойрогой Захиргаанай дэмжэлтээр Россиин үндэһэтэнэй эд зөөриин ба гүрэнэй албанай академиин (РАНХиГС) Шэтын таһаг мартын 3-да бүгэдэ буряадай «Эрдэм» диктант 4-дэхеэ үнгэргэбэ.
Энэ жэл Россида, Хитадта, Монголдо, Турцида, Германида, Польшодо — суг хамта 708 хүн хабаадаба. Тэдэнэй 61-иинь интернедээр онлайн бэшээ. Агын тойрогто 404 хүн диктант бэшэһэн байна: Агын аймагта — 120, Могойтын — 150, Дулдаргын — 97, Ага тосхондо — 37 хүн.
Ага тосхонойхид Агын социальна һалбариин ажалтадай мэргэжэл дээшэлүүлгын һургуулиин хоёр таһалга соо диктант бэшээ юм. Агын 2-дохи һургуулиин буряад хэлэнэй багша Г.С.Цыренжапова ба хүүгэдэй уран урлалай байшанай багша С.О.Раднабазарова текстыень уншаа.
Эгээл олон хүн Могойтын аймагта бэшээ. Н.Очировай нэрэмжэтэ номой сан, тиихэдэ Ага-Хангилай, Догойн, Зугаалайн, Сагаан-Уулын, Уртын, Хүһөөшын, Сагаан-Шулуутайн дунда һургуулинууд диктант бэшэлгын талмайнууд болоо юм.
Хабаадагшад нэгэл текст — 170-аад үгэһөө бүридэһэн Доржо Эрдынеевэй «Элинсэгэймнай эхин» гэһэн зохёолһоо хэһэг бэшээ. Онлайн бэшэгшэдтэ Шэтын гүрэнэй телерадиокомпаниин сурбалжалагша С.Сономова уншажа үгэбэ.
Хабаадагшад апрелиин 1 болотор үнэмшэлгэнүүдтэ хүртэхэ, харин эрхимүүдынь тусхай бэшэгүүдые абаха юм. Диктантын дүнгүүдтэй мартын 16 болотор интернет соо танилсаха арга бии.
Эрдэм НИМАЕВ.
Могойтын аймагай Сагаан-Шулуутайда буряад хэлэнэй багша Баирма Гомбоевагай ударидалга доро 13 хүн диктант бэшээ. Эгээл залуунь – 6-дахи ангиин hурагша, 11-тэй Сарана Соболева. Эгээл үндэр наhатайнь – 81-тэй Хандажаб Максаровна Болотова Туяна аша басагантаяа хабаадаа.
Шалгалтын дүнгүүдээр, экономистЦ.Жамбалова ба багшын ажалай ветеран Б.Гомбоева, фельдшерЦ.Жалсандоржиева түрүүшын hууринуудые эзэлбэ.
Суута шатаршан Цырендулма Дамдинова буряад хэлэ эхин шатын һургуулида оройдоо 2 жэлэй туршада шудалhан. Тиибэшье эрхимээр диктант бэшэжэ, 94 балл абаhан байна. Цырендулма Цыбендоржиевна иигэжэ тэмдэглэбэ: «Түбэдhөө Агын дасанда ерэhэн үндэр зиндаатай Галсан багша буряад арадай хүн бүхэндэ хандан, иигэжэ хэлэhэн байна: «Түрэл хэлэеэ мартахадатнай, дээдын абарагша сахюусадтнай таанадые ойлгохоёо болино. Тэрэ ушараар ажамидаралтнай бүри хэсүү болохо...».
Баярма БАТОРОВА
Толон